في محاولة أخيرة منه للتلميع بعد الخروجين الحزينين من دوري أبطال أفريقيا ودوري أبطال العرب يتعاقد حالياً مجلس إدارة الزمالك مع لاعب الفريق السابق والمنتخب المصري ولاعب رايزاسبور التركي حالياً المدافع بشير التابعي. وهذه الصفقة تتناغم مع ما يتردد عن قرب حسم الزمالك لصفقتي أحمد حسن لاعب أندرلخت البلجيكي وعبدالظاهر السقا لاعب كونياسبور التركي لتكتمل دار المسنين في الزمالك ويكون على أتم الاستعداد للمنافسة على دورة نادي كفر الهوا الخيالية في رمضان القادم إن شاء الله.

بشير التابعي من مواليد 24 فبراير 1976، يعني لما يرجع الزمالك إن شاء الله هيكون بيتم 32 سنة. وده نفس سن أحمد حسن. أما بقى عبد الظاهر فأكبر شويتين بس ما يضرش الدهن برضو في العتاقي زي ما كلنا عارفين. عبد الظاهر من مواليد 30 يناير 1974 يعني لما يروح الزمالك لو راح يعني هيلعب وهو عنده 34 سنة.

من غير بقى تعصب وتشنجات تعالوا نشوف الأهلي لما مر بنفس التجربة دي من تلت أربع سنين اشترى مين وكان عندهم كام سنة. محمد أبوتريكة وكان عنده 25 سنة. محمد بركات وكان عنده 27 سنة. محمد شوقي وكان عنده 22 سنة. عماد النحاس وكان عنده 27 سنة. جيلبرتو وكان عنده 20 سنة. فلافيو وكان عنده 26 سنة. إسلام الشاطر وكان عنده 27 سنة. الله يرحمه محمد عبدالوهاب وكان عنده 22 سنة.

يعني يا ناس ولا لاعيب منهم كان فوق التلاتين، وعلى فكرة لما جوزيه أصر على التعاقد مع عبدالحميد حسن لاعب إنبي وأسيوط السابق اتسلخ من طوب الأرض، ومن إدارة الأهلي قبل جمهوره. ده حتى أحمد بلال اللي نص الأهلوية موش مقتعنين بالصفقة من أصله لما الأهلي استعاده تاني جابه والراجل عنده 27 سنة.

بقى فيه نادي في العالم عاوز ينافس على بطولات يحوّل الفريق الأول لدار مسنين بالمنظر ده؟ لأ وإيه، قالك أوعى وشك،هنفور الفريق الحالي ونستنغنى عن عشر لاعيبة دفعة واحدة، تيجي تبص على اللي المفروض يتفوروا رغم اقتناعنا بأنهم فعلاً لازم يمشوا، تلاقي نصهم في منتصف العشرينات من العمر، ده عبث إيه ده؟! يعني نمشي صغيرين نجيب صغيرين. طب نجيب أصحاب خبرة في آواخر العشرينات، إنما نجيب ناس بتختم حياتها الكروية؟

أنا اللي صعبان عليا بجد جمهور الزمالك الغلبان ده اللي هيصدق الفيلم ده ويقولك عودة الزمن الجميل وعودة البطولات وبعدين هيفوقوا على أسوأ كابوس. قولنا إدارة محترمة، وناس الزمالك ما كانش يحلم إنهم يكونوا في مجلس إدارته لكن يظهر كدة والله أعلم إن صدمات الخروج من البطولات المختلفة كان ليه رد فعل عنيف على مجلس إدارة الزمالك الحالي. يا أستاذ ممدوح، هوه أنت لاقي فلوسك في الشارع؟ يا راجل مصر مليانة مواهب في زهرة شبابها، سيبك بقى من الصفاقسي وانسى إنه كسب الأهلي في تونس واتعادل معاه في القاهرة، وسيبك من القدامى وفكر في مستقبل الزمالك!

نداء إلى القائمين على الكورة في مصر بضرورة إجراء انتخابات عاجلة لانتخاب مجلس إدارة جديد للزمالك على شرط واحد بس: كل اللي اترشح أو اتعين قبل كدة ممنوع يترشح تاني. ناس جديدة بقى وأفكار جديدة وكفاية لحد كدة. هيه إيه؟ جنينة؟!

© 2007 جووول.نت. جميع الحقوق محفوظة.