انتهى الحلم، وفوزنا بفضل الله ببطولة إفريقيا. وفرح الوطن، فرح الشعب المطحون، فرح لاعبو المنتخب، وفرح كل الرياضيين. وكعادتنا فإننا ننسى، أو بالأصح نتناسى. فلو كنا خسرنا البطولة لطالبنا بتعليق المشانق لكل المقصرين وأولهم الكابتن حسن شحاتة. أما وقد نصرنا الله وحققنا اللقب فيجب تعليق نفس تلك المشانق لكل من وقف عقبة في طريق هذا الإنجاز وأولهم الكابتن أحمد شوبير، نائب رئيس اتحاد الكرة.

قبل ما أدخل في الموضوع أنا عايز أوضح الفرق بيني أنا وغيري من اللي انتقدوا الكابتن حسن شحاتة قبل بداية البطولة من ناحية وبين الكابتن شوبير من الناحية التانية. أنا انتقدت الكابتن حسن وكتبت إن فكره دفاعي وإن أداء المنتخب وحش. لكن بمجرد البطولة ما ابتدت أنا وكل اللي انتقدوا الكابتن حسن وقفوا وراه علشان خاطر مصر. فمن ناحية النقد وقف والمساندة ابتدت. دي واحدة.

الحاجة التانية إنه من أول ماتش لمصر في البطولة رفعنا لحسن شحاتة القبعة وقولنا له أنت صح وإحنا غلط واعترفنا بغلطنا وكتبت بالنص " برافو حسن شحاتة ... بصراحة يا معلم ثبتني. طبعاً أنا ما بأخجلش إني أقر بالحقيقة". يعني بدون مكابرة وعند أقرينا للمعلم بمعلمته وساندنا المنتخب لحد النهاية.

الحاجة التالتة إن أنا وغيري مجرد ناس بتكتب، ومن حقنا حتى لو اختلفنا مع المعلم للنهاية إننا نعمل اللي إحنا عايزينه. إنما الكابتن شوبير ده نائب رئيس اتحاد الكورة وما ينفعش يعمل اللي إحنا بنعمله، وإذا كان هوه مقتنع إنه ممكن يبقى نائب رئيس اتحاد الكورة وفي نفس الوقت إعلامي محايد فدي مشكلته هوه وده اللي إحنا هنتعرض له في المقالة دي.

خلفية بطولة الأمم بتقول إن شوبير وبعض أعضاء مجلس إدارة اتحاد الكورة كانوا ضد استمرار المعلم. والموقف ده طبعاً كان من قبل بطولة أمم إفريقيا 2006، لكن لما المعلم كسب البطولة في مصر شوبير وفريقه سكتوا واستمر المعلم في منصبه. لكن ما يمنعش إنه كان فيه مناوشات كل شوية بحجة ضعف مستوى الفريق خلال تصفيات بطولة 2008 وعجز مصر عن الفوز خارج ملعبها.

برضو هنقول من حق شوبير إنه يتحفظ على المعلم، لكن الأخطر من وجهة نظري كان تصريح مانويل جوزيه المدير الفني للأهلي إن شوبير عرض عليه تدريب المنتخب بدل المعلم. هنا بقى إحنا بنلعب في الكواليس وبنتربص بالمعلم. عموماً هنعديها لإن ما عندناش عليها دليل قطعي.

الكابتن سمير زاهر عمل أكتر من جلسة صلح بين شوبير والمعلم على حد وصف الكابتن حسن شحاتة وفي كل مرة كانوا بيقروا الفاتحة وبعديها على طول يطلع شوبير يقطع في فروة المعلم. برضو من هنعديها ونقول من حق شوبير يتحفظ على المعلم، هوه بالعافية يعني.

طول بطولة إفريقيا شوبير ما إداش المعلم حقه وفضّل إنه يمدح اللعيبة ويرجع لهم الفضل في الأداء والنتايج. جايز بافتراض إن فوز مصر بالبطولة من المستحيلات وبالتالي أي مديح للمعلم موش هيبقى له معنى لما تخرج مصر من البطولة وييجي وقت تقطيع المعلم. المفاجأة إن مصر كسبت البطولة وما بقاش فيه بطل على الساحة غير المعلم حسن شحاتة. يا للهول، أهو ده اللي ما كانش شوبير عامل حسابه.

بمجرد حكم مبارة النهائي ما أطلق صفارة النهاية كان من أوائل تعليقاتي بعد حمد الله إن شوبير لازم يقدم استقالته. ما فيش حاجة ملموسة تعيب شوبير غير يمكن بعض التصرفات المتسرعة طول فترة عمل المعلم اللي أعاقت شغله وبعض التصريحات المعادية ليه، لكن في النهاية إحنا لازم نقر إن من حق شوبير إنه يتحفظ ويعترض على حسن شحاتة ويطالب بإقالته زي ما هو عاوز.

طيب دلوقتي بعد ما الكابتن حسن أثبت للعالم كله، موش لشوبير بس، كفاءته التدريبية، الكابتن شوبير أصبح من وجهة نظري المتواضعة ما لوش مكان في المنظومة الرياضية المصرية. باختصار شديد يا إما الكابتن حسن يا إما الكابتن شوبير مع اختلاف المناصب والاختصاصات. وتعالوا نبص على النادي الأهلي وعلى مجلس إدارته علشان نفهم النقطة دي أكتر. تعالوا نسترجع إزاي شوبير نفسه وإزاي الكابتن طاهر أبوزيد رغم إنهم قد يكونوا أكفاء لكنهم ما لهمش مكان في مجلس إدارة الأهلي لإنهم موش راكبين على المجموعة وبالتالي الجمعية العمومية لفظتهم بره الإدارة. موش عيب وموش غلط، المهم مصلحة النادي.

وفي حالتنا المهم مصلحة مصر. وشعب مصر اختار الكابتن حسن شحاتة يا كابتن شوبير. شعب مصر اختار المعلم، وللأسف الشديد علشان يعلن رسالته بوضوح أساء ليك يا كابتن شوبير على الملأ في الشوارع. هتف للمعلم وهتف ضد شوبير.

وبالتالي يا كابتن شوبير إحنا من منبرنا المتواضع وعلشان خاطر مصر، بنطالبك بتقديم استقالتك وإفساح المجال لحد تاني يكون بيحب الكابتن حسن شحاتة ومستعد يوفر له لبن العصفور علشان خاطر مصر تروح كاس العالم. متهيألي التنازل عن عضوية اتحاد الكورة مع الاحتفاظ بعضوية مجلس الشعب والعمل الإعلامي موش كتير على مصر.

يا كابتن شوبير ... الله يرضى عليك ... كفاية !