في واحدة من أقوى الصفقات الشتوية تعاقد النادي الأهلي المصري في شهر يناير 2007 مع التونسي أنيس بوجلبان لاعب وسط الصفاقسي التونسي وصيف الأهلي في بطولة أفريقيا للأندية الأبطال لسنة 2006. حلو، مين بقى وجيه ده؟

وجيه عبدالعظيم، لاعب وسط النادي المصري البورسعيدي. من مواليد سبتمبر 1979، عنده 27 سنة، يعني أصغر من أنيس بوجلبان بسنة. يجيد اللعب في أكثر من مركز، يعني ممكن يلعب وسط مدافع، والأهم إنه المصري دلوقتي بيلعبه ناحية الشمال. تقول مدافع شمال ماشي، وسط شمال ماشي، جناح شمال برضو ماشي. يعني في نفس مركز جيلبرتو والله يرحمه محمد عبدالوهاب. والراجل أثبت كفاءة غير عادية في هذا المركز.

أنا موش هاعمل زي ربنا يسامحهم الناس التانية وأتكلم عن الجانب المادي من صفقة أنيس بوجلبان لإن ربنا سبحانه وتعالى بيقول " يا أَيها الذين آمنوا إِن جاءكم فاسق بنبإ فتبينوا أَن تصيبوا قوما بجهالة فتصبحوا على ما فعلتم نادمين". لكن طبعاً التكتم الشديد من الجانبين على المقابل المادي بيقول إنه موش قليل، ودي حاجة طبيعية، لكن موش لاعيبتنا المصريين أولى؟ موش بس بالفلوس، كمان باللعب في نادي كبير زي النادي الأهلي؟

أول مرة وجيه عبد العظيم لفت انتباهي كان من حوالي تلت أسابيع في ماتش المصري والإسماعيلي في بورسعيد اللي انتهى بالتعادل 1-1. الراجل أظهر لفتات مهارية تخض. ترقيص ولعب بالكعب وسرعة ومهارة وتسديد. حاجة تفرح! قلت أقرأ عنه شوية. لاقيت مثلاً إنه في ماتش المصري مع الأهلي كان مكلف بمراقبة أبوتريكة ووقف تقريباً خطورته. ولقيت إنه كان ليه بصمة واضحة في فوز المصري على الزمالك 2-0 في بورسعيد. طيب طالما الأهلي بيعاني من نقص في الناحية الشمال، موش كان وجيه أولى؟

على فكرة أنا استنيت بالمقالة دي لحد 1 فبراير لأن فترة التعاقدات الشتوية بتنتهي رسمياً يوم 31 يناير، وأنا كنت طلبت من أحد أعضاء مجلس إدارة الأهلي (على فكرة الناس دي محترمة أوي) إنه يطلب من مانويل جوزيه يتفرج على ماتش المصري والإسماعيلي الأخير علشان يحكم بنفسه على وجيه، ووعدني إنه يبلغهم. بصراحة ماعرفش إيه اللي حصل بعد كده غير إنه بعدها بكام يوم تعاقد الأهلي مع أنيس بوجلبان. قلت ماشي هيشتروا الاتنين. ما حصلش، من حقهم ولكن كمان من حق وجيه عبد العظيم إننا نديله حقه ونقول بالفم المليان: "وجيه عبد العظيم أحسن لاعب وسط شمال في مصر".

ماعرفش هتصدقوني واللا لأ بس أنا عندي شهود للي عاوز. لما الأهلي كان في أسوأ حالاته في السنين العجاف من 2001 ل2003 أن قلت لمعظم اللي أعرفهم إن حسام غالي أحسن لاعيب في مصر. فين حسام غالي النهاردة؟ وبالمناسبة بقى إذا كنا عايزين نتكلم عن أفريقيا وعن الصفاقسي، فيبقى كريم النفطي أحرف وأمهر لاعب وسط شمال في أفريقيا النهاردة. أهو ده بس اللي لو كان الأهلي اشتراه كنت هأقول ماشي وجيه يصبر شوية.

طب ليه وجيه ما يروحش الزمالك، وليه ما طلبتش من مجلس إدارة الزمالك إنه يشتري هوه وجيه؟ علشان الزمالك عنده طارق السيد ناحية الشمال وده لاعيب أساسي في الزمالك وفي منتخب مصر وبديله أسامة حسن بقى أحسن منه، فالاتنين ما شاء الله فورمة عالية. إنما بصراحة مع كل احترامي لأحمد شديد وطارق السعيد الأهلي محتاج لاعيب بكفاءة وجيد عبدالعظيم ناحية الشمال.

تابعوا وجيه عبدالعظيم، واحكموا بنفسكم!

© 2007 جووول.نت. جميع الحقوق محفوظة.