المقالة دي قراءة في تاريخ الأهلي والزمالك، لإن قراءة التاريخ بعمق بتساعد كتير على التعامل مع المستقبل. موش هأقول دي توقعاتي، لكن تعالوا نعتبرها دردشة في الماضي والمستقبل ونتناقش فيها بهدوء. الموضوع هيكون مفرح جداً للزمالكاوية ومقلق جداً للأهلوية، لأنه بيقول باختصار إن العجلة دارت دورتها، وإن الكام سنة اللي جايين بتوع الزمالك.

من غير انفعال كدة وواحدة واحدة، تعالوا ناخد التاريخ الحديث ونشوف كده الأهلي والزمالك حالهم كان عامل إزاي مع بعض وبالتالي أثر إزاي على إنجازاتهم بصفة عامة.

بداية من موسم 1995/1996 ولحد آخر شهر في سنة 1999 الأهلي كان كعبه هوه اللي عالي فكسب الزمالك 2-0 و3-1 و2-0 تاني و2-1 وانسحب الزمالك في ماتش بعد أربع دقايق كان غالباً هيخلص بفضيحة، وكانت أفضل نتايج الزمالك مع الأهلي في الفترة دي هي التعادل 0-0 تلت مرات.

أنا بقى اللي يعنيني في الهيصة دي كلها هو آخر ماتش بينهم قبل الزمالك ما يحقق أول فوز ليه. الماتش ده الأهلي كسبه 2-1 بجولين لإبراهيم وحسام حسن، وجول الزمالك جابه محمد صبري. الأهلي تقدم الأول بجول إبراهيم حسن، وبعدين محمد صبري اتعادل، وبعدين حسام جاب جول الفوز للأهلي. وكان فوز صعب ولأول مرة يكون الزمالك ند للأهلي على مدار 5 سنين. واللي أنا فاكره كويس إن إبراهيم حسن تحدث للإعلام بعد الماتش وقال إن الفوز ده اللاعيبة هيه اللي جايباه موش الإدارة ولا الجهاز الفني. طبعاً كانت المشاكل بدأت بسبب عدم تجديد إدارة الأهلي للتوأم.

وفي يوم 5 ديسمبر 1999 اتقلبت فعلاً الدفة وكسب الزمالك بجولين لبشير التابعي وإسماعيل كوليبالي مقابل هدف للأهلي جابه علاء إبراهيم. ولحد شهر مارس 2004 فضل الزمالك كعب الأعلي فكسب 3-1 و2-1 تاني و3-1 تاني و1-0 و2-1 تالت، باستثناء طبعاً السدادية الشهيرة اللي سجلها الأهلي في النص بتاريخ 16 مايو 2002.

تعالوا نمسك تاني آخر ماتش الزمالك كسبه قبل الأهلي ما يستعيد الدفة. كان يوم 15 مايو 2004 وبرضو خلص 2-1. الزمالك اتقدم 2-0 بجولين لبشير التابعي وعبدالحليم علي، وأبوتريكة جاب جول الأهلي في أول مشاركة ليه بعد انتقاله من الترسانة. وكان الأهلي بيلعب ناقص واحد من الدقيقة 14 بعد طرد أحمد السيد، لكن رغم كده كان أكتر من ند وقدر يجيب جول وخرج الزمالكاوية متنكدين لأنهم ما عرفوش يجيبوا في الأهلي سكور كبير وهوه بيلعب ناقص تقريباً الماتش كله.

وبالتالي في يوم 4 نوفمبر 2004 كسب الأهلي 4-2. وبعديها كسب 3-0 و2-1 و2-0 و2-0 تاني و2-0 تالت. النتايج دي طبعاً كان فيها ماتشين بطولة أفريقيا اللي الأهلي كسبهم رايح جاي. لحد يوم 30 ديسمبر 2006، يعني السنة اللي فاتت على طول، وكسب الأهلي 2-1. آآآه، أهو الواضح كده إن 2-1 دي بقت كلمة السر، وبالذات لما الفريق اللي كان بيتغلب ما يبقى ند ويتغلب بالعافية. وده اللي حصل من ساعة ما أسامة حسن جاب جول الزمالك في الماتش الأخير.

متهيألي الصورة وضحت لكم شوية. الزمالك بيعود بقوة، والنتيجتين الآخيرتين في البطولة العربية بقولوا كده. ماتش القادسية احنا اتكلمنا خلاص عليه في مقالة سابقة. وامبارح الزمالك كسب أهلي البرج في الجزائر وده انجاز بكل المقاييس، وبالأخص لو بصينا لطريقة تعامل الزمالك مع المباراة عن طريق الدفاع الحذر مع التركيز على التسجيل من أي فرصة. وده اللي حصل. وأنا كنت كتبت قبل كده على الموقع في مقالة "وكإن الزمالك خد كاس العالم" إن الزمالك لو وصل قبل النهائي غالباً هياخد البطولة. فأنا بإذن الله بأهنيه مقدماً.

حاجة أخيرة ناخد بالنا منها كدة. كام السنة بيدوم التفوق لفريق منهم؟ الأهلي تفوق من 1995 لحد 1999. والزمالك تفوق من 2000 لحد 2004. وبعدين الأهلي تفوق تاني من 2004 وأدينا في 2007.

الواضح كدة إن أول ماتش جاي بين الأهلي والزمالك هيكون من نصيب الزمالك، وهيكون بداية تفوق الزمالك في الكام سنة اللي جايين. ده حال المد والجزر بين القطبين. والله أعلم!