فاز النادي الإسماعيلي على النادي الأهلي بهدف للا شيء في ختام مباريات الدوري المصري لموسم 2006-2007. سجل هدف المباراة الوحيد هداف النادي الإسماعيلي الحالي ولاعب الأهلي السابق محمد فضل قبل نهاية المباراة بعشر دقائق ليصبح الإسماعيلي الفريق الوحيد الذي يهزم الأهلي ذهاباً وإياباً في الثلاثة سنوات الأخيرة. وعلى الجانب الآخر قد تكون هذه المباراة هي الأخيرة لمهاجم النادي الأهلي أحمد بلال. ندعو نعرف الأسباب.

النتيجة وكانت معروفة مسبقاً، ولو إن الجول اتأخر شويتين لأن أداء الأهلي كان أفضل كتير من أداءه قدام الزمالك. إنما اللي ما كانش ولا على البال ولا على الخاطر هوه الأداء الهيروغليفي اللي ظهر بيه أحمد بلال. شوفوا يا جمهور الأهلي، أنا أقبل أي حاجة في الدنيا، إلا الأنانية. دي بقى اللي بأقف عندها وأجلد لمصلحة اللعيب قبل أي حاجة تانية.

إيه ده؟! أنا على ما أذكر ما شوفتش في حياتي مهاجم ظهر بهذا المظهر السيء. حاجة تستفز المتفرج. يعني يبقى نفسك تشوف جملة حلوة في الملعب، ييجي أحمد بلال يقولك لأ. الكورة تروح للإسماعيلي تبص تلاقي سيد معوض وعمر جمال بيقسموا أحلى جمل. إيه الحلاوة دي! ترجع الكورة للأهلي، تقول يللا بقى مرة تانية علشان نستمتع، بلال يقولك برضو لأ. هو إيه أصله ده؟ يا راجل ده أنت لو مستأصدنا ما كونتش تعمل فينا كده.

الكورة توصل لبلال، الحمد لله عرف يوقفها. بصة يمين، بصة شمال. الناحيتين بفضل الله مفتوحين. ناحية فيها أحمد جلال والتانية فيها عبدالحميد حسن وأي تمريرة لواحد منها هتعمل هجمة خطر للأهلي. طب بصة كمان، يمكن ما كانش شايفهم كويس. يللا بقى هه. وفجأة بلال قرر يشوط من نص الملعب في إيد محمد فتحي. الحمد لله إنها جت بين التلت خشبات. أصلها في الشوط التاني اتكررت هيه هيه، نفس المشهد، بس الشوطة راحت جنب راية الكورنر.

ده كل ده ولسه ما اتعرضناش للقطة المباراة. حد عارفها؟ طب حد يقدر يخمن؟ هنتكلم عليها كمان شوية.

كورة عالية للنادي الأهلي، يطلع عليها محمد فتحي وتحتيه أعتقد معتصم سالم ومعاه أحمد بلال. بمجرد ما محمد فتحي نط علشان يمسك الكورة، عمك أحمد بلال إداله ضهره ولف. قامت الكورة وقعة من إيد محمد فتحي. يا ترى هتعمل إيه يا بلال؟ أروح ما روحش؟ أروح ما روحش؟ أقولك خليك مكانك يا راجل، على ما تروح يكون فتحي جابها تاني.

نيجي بقى للقطة المباراة. في بداية الشوط التاني الأهلي جاله هجمة من ناحية اليمين، أحمد عادل جري لما اتقطع نفسه، وبعدين لعبها بالعرض داخل منطقة الست ياردات للنادي الإسماعيلي. الكورة مشتركة، مرة تانية، داخل الست ياردات للنادي الإسماعيلي. الكورة مرة تانية مشتركة بين أحمد بلال وهاني سعيد. تفتكروا إيه الي حصل؟ هاني سعيد انقض على الكورة. عادي، ما هوه المدافع. عملت إيه يا بلال. أدينا بأحاول، هأحلق عليه. عمك هاني سعيد بدل ما يطفش الكورة زي 150% من مدافعي العالم ما بيعملوا، خد عمك أحمد بلال في ضهره ولف بيه "جوه الست ياردات". وبعدين مشي بالكورة "جوه الست ياردات"، وبعدين بصاها لواحد تاني "جوه الست ياردات". "واحنا قاعدين" على رأي ربنا يهديه عادل إمام.

أنا شوفت كتير وقليل. شوفت أنانية عمرو زكي، وطالبت مجلس إدارة الزمالك إنه يشده شدة كويسة وأهم الحمد لله جلدوه لما انصلح حاله. إنما عمرو زكي كان أناني وبيموت نفسه في الملعب، إنما أنانية بالمنظر ده ما عدتش عليا قبل كدة. صدقوني يا جمهور الأهلي، النوعية دي من الاستهتار هيه بالظبط اللي كان عليها لاعيبة الأهلي تقريباً كلهم من 2000 ل2003. وصدقوني لو قلتلكم إنها معدية، وعلشان كدة أنا في مقدمة المقالة قلت إن ده كان غالباً ماتش الوداع لأحمد بلال مع الأهلي. يعني ما أتصورش أبداً إن مانويل جوزيه لما يتفرج على الماتش هيفكر أصلاً يدخله في قايمة ال18 لأي ماتش جاي والأيام بيننا.

سريعاً كدة قبل ما أنسى. يا سيد معوض ويا حسني عبد ربه، إيه الأخلاق الوحشة دي. يا جماعة أمال لو كنتم خسرانين كنتم هتعملوا إيه؟! بصراحة اللي شفناه منكم أنتم الاتنين في نهاية الماتش حاجة مقززة.

يا حسام يا عاشور، مين علمك تتحكم في أعصابك؟ ما شاء الله لا قوة إلا بالله يا ريتهم كلهم بيتمالكوا نفسهم زيك. مرة مع هاني سعيد والتانية مع حسني عبد ربه وفي المرتين كان وشك بيقولهم "عيب".

مدافع النادي الأهلي محمد سمير اكتشاف جديد رائع رائع رائع.

يا أمير يا عبد الحميد. دلوقتي بس عرفت ليه كنت بتشد في شعرك وأنت قاعد على الدكة. وعرفت كمان ليه صديقي ابن الزمالك قال عليك أحسن من عصام الحضري. بصراحة خضتني.

يا عمر يا جمال. ما شاء الله لا قوة إلا بالله، اللعبة اللي بتغمزها برجلك من فوق لاعيبة الأهلي وتاخدها من الناحية التانية دي بتعملها إزاي؟ بيسموها شمسية باين؟ يا راجل ده احنا كنا نسينا الكلام ده في ملاعبنا من زمان. ربنا يحميك لمصر.

يا محمد يا فضل، أنت واخد بالك إنك جبت السنة دي في الأهلي تلت أجوال. أنا بصراحة موش فاكر مين عمل ده قبل كدة. وبصراحة موش عارف كابتن حسن شحاتة ناوي يديك الفرصة امتى. أنا ابتديت أشك إنه هيديها لفلافيو الأول.

كل سنة وأنتم طيبين! مبروك للأهلي الدوري، وعود حميد للزمالك، وليلته بيضه إن شاء الله اللي هيقع منكم في سكة الإسماعيلي في الكاس.